Mótmælastaða

 

 Kæru sveitungar

 

Við erum persónur, hópur, heild sem Íslendingar.  Á þeim forsendum og á þeim lýðræðislega rétti sem okkur er gefinn, hafa nokkrir einstaklingar ákveðið að efna til mótmælastöðu í þögn laugard. 17.jan. í okkar heimabyggð í Mývatnssveit.  Fjöldi mótmælenda eða stærð byggðarlags skiptir hér ekki máli.  Raddir fólksins þurfa að heyrast sem víðast.

 

Mótmæli hafa lítil áhrif ef vindurinn einn er til vitnis.  Þess vegna höfum við sent fjölmiðlum orðsendingu (frétt) fyrir fundardag og önnur verður send eftir fundinn.  Á þann hátt munu valdhafar í grafarþöfn og sjálfsafneitun, spillingarmenn og þjófar eigna og fjármagns saklausra borgara, fá skýr skilaboð.  Þá komast þeir ekki upp með að setja þagnarsultu og súran rjóma á sínar flatneskjulegu ráðleysispönnukökur alla daga.  Þeir sem hafa áhuga á að leggja málinu lið eru hjartanlega velkomnir.

 

Að okkar mati eru nokkrir valkostir í stöðu Íslands í dag:

 

Að þegja, sitja heima og samþykkja þannig ástandið.

Að blístra fallegt lag og yppta öxlum í takt.

Að taka því sem að höndum ber.

Að standa upp og segja: "Vér mótmælum öll".

 

Staðsetning mótmælanna verður á landi ríkisins, á bílastæðinu við Dimmuborgir. Tími 15:00 laugard. 17.jan.

 

Ath.  Í upphafi fundar gefst kostur á að kasta (gúmmí)skóm í táknmynd spillingarinnar, hugleysis og vesældóms ráðamanna.  Losa um reiðina

Á eftir þessum gjörningi verður þagnarstaða í 5-10 mín.

Snjallræði er að taka með sér heitt á brúsa og afgang af jólabakstri.

Kveðja,

Fyrir hönd hópsins.  Ólafur Þröstur. 

 

  Þessi tilkynning datt hér inn um lúguna í dag og er ég fyrir mitt leiti alsæl með að einhver hafi tekið af skarið og komið þessu á og mun að sjálfsögðu taka fullan þátt í þessari vakningu. Því skelli ég þessu hér á þennan vettvang.

Er svo á leið í byltingakaffi síðar í dag ...

 Lafðin

Athugasemdir

[Rakel Sigurgeirsdóttir, 15.1.2009 kl. 22:17]

Gott að heyra Vona að sveitungar þínir fjölmenni á mótmælin!

[Lafðin, 16.1.2009 kl. 08:59]

Það vona ég líka.  Mikilvægast er að raddir okkar heyrist sem allra víðast.  Hef trú á að nú fari að bætast inn fleiri byggðarlög og punktunum á landakortinu að fjölga og í kjölfarið eykst þrýstingurinn á stjórnvöld að hlusta !